ភ្នំពេញ៖ អ្នកនាំពាក្យរងនៃក្រសួងមហាផ្ទៃ លោក ទូច សុខៈ បានបញ្ជាក់ឱ្យដឹងថា រយៈពេល៦ខែដើមអាណត្តិរាជរដ្ឋាភិបាលទី៧នេះ អាជ្ញាធរឃាត់ខ្លួនជនសង្ស័យគ្រឿងញៀនជិត១ម៉ឺននាក់ រឹបអូសបានគ្រឿងញៀនជាង២តោន សារធាតុផ្សំចំនួន២៥៣គីឡូក្រាម និងកញ្ជាក្រៀមចំនួន៤៥គីឡូក្រាម។
លោក ទូច សុខៈ បញ្ជាក់ឱ្យដឹងទៀតថា ក្នុង៦ខែដើមអាណត្តិនេះ អាជ្ញាធររឹបអូសបានវត្ថុតាងផ្សេងៗ ដូចជារថយន្តចំនួន១០៤គ្រឿង ម៉ូតូ ១១៨៤គ្រឿង ទូរសព្ទដៃ៣៨៧៧គ្រឿង អាវុធខ្លី៣៤ដើម អាវុធវែង៤ដើម និងជញ្ជីងថ្លឹង២៦១គ្រឿង។
បើតាមលោក ទូច សុខៈ កម្ពុជាមិនមែនជាប្រទេសផលិតគ្រឿងញៀននោះទេ ពោលជាប្រទេសដែលរងគ្រោះដោយជនឧក្រិដ្ឋយកសារធាតុផ្សំផ្សេងៗមកផលិតជាគ្រឿងញៀន និងលួចនាំចូលខុសច្បាប់។
ការជួញដូរគ្រឿងញៀន នៅតែជាបញ្ហាដ៏ធំដែលរាជរដ្ឋាភិបាលកម្ពុជាតែងយកចិត្តទុកដាក់បង្រ្កាប និងទប់ស្កាត់តាមរយៈការពង្រឹងការគ្រប់គ្រង និងត្រួតពិនិត្យគ្រប់ច្រកល្ហក ជាពិសេសផ្លូវគោក ផ្លូវទឹក និងផ្លូវអាកាស៕
